සිරි යහනේ ලනු ඉහිරී සුසුම් හෙලන රැ…. 

ගීතයේ අරුත

එඩ්වඩ් ජයකොඩි මහතා ගායනය කරන ලූශන් බුලත්සින්හල මහතා විසින් රචිත මේ ගීතයෙන් කියවෙන්නෙ විවාහ ජීවිතයට පත්වන්නට නිසි වයසත් පසුවුනු තරුණයෙකුගේ සිතිවිලි සමුදායක්.

සිරි යහන කියන්නේ විවාහ පත් යුවලක් නිදන ඇඳක්. සාමාන්‍යයෙන් සිරි යහන කියන්නෙ නිසි ආකාරයෙන් සකස් කල ඇඳ ඇතිරිලි , කොට්ට මෙට්ට වලින් යුත් තැනක්. සිරි යහන පිලිවෙලකට සකසන්නෙ බොහෝ විට නිවසේ සිටින බිරිඳ. සිරි යහනේ ලනු ඉහිරිලා කියන්නෙ මේ තරුණයා නිදා ගන්නා ඇඳ පිලිවෙලට සකස් කර තබාගන්න කිසිවෙක් නෑ කියන එක.

අපි සුසුම් හෙලන්නෙ බලාපොරොත්තු කඩවීමකදි හෝ නොලැබීමකදි. මේ තරුණයත් අපිලිවෙලවු අබලන් වු ඇඳක රාත්‍රියේ සුසුම් හෙලනෙත් තමන් නොලද විවාහ දිවිය ගැන සිතමින්.

මේ ආකාරයට හුදෙකලාව ඉහල බලාගෙන සුසුම් හෙලන ඔහුට පේනවා ඇඳට ඉහලින් වියනක් වගේ මකුළුදැල් බැඳෙන ආකාරය. තනිකඩයෙක් ඉන්න කාමරයක මකුළු දැල් කැඩෙන්නෙ බොහොම කලාතුරකින් නේ. අනිත් කාරනය, මකුළු දැල් බැඳෙන්නෙ අතහැර දැමූ හෝ පාළුවට ගිය පරිසරයක, ඔහුගේ ජීවිතයත් කාන්තාවකගේ සංස්පර්ශයක් නොලද තනිවූ ජීවිතයක්.

නාරිලතා මල් කියන්නේ කාන්තා රූපයක ඇති ලාලිත්යය සහ හැඩතල පෙන්වන කල්පිතයක්. යට ලීයෙන් නාරිලතා මල් පූදින්නේ.

ඇඳේ දිගාවෙලා වහළය දිහා බලාගෙන කල්පනා කරන මේ තරුණයාගෙ යටි සිතින් ඔහු එදිනෙදා දකින කාන්තාවන්ගේ රූප කායන් ඇසුරු කොටගෙන මනංකල්පිත කාන්තා රූප මැවෙනව. මෙලෙස පූදින සිතිවිලි/ කාන්තා රූප වල හැඩතල කවියා උපමා කරන්නෙ නාරිලතා මල් වලට.

සඳෙන් සඳට මුවා වෙලා කල දවසත් ගෙවීගියා. සඳක් පිරෙන්නෙ මාසයකටවතාවක්. කලදවස කියන්නෙ විවාහ විය යුතු කාලය. මාසයෙන් මාසය නොදැනුවත්වම විවාහ විය යුතු කාලයත් ගෙවී ගිහින්.

මාල වලලු නොතිත් අයට අප අමතක වෙලා ගොසින්. කිසිම දිනෙක මාල වලලු තිත්ත වෙන්නෙ / එපා වෙන්නෙ නැති පිරිස, එහෙමත් නැතිනම් ගැහැනු අයට අප අමතක වෙලා.

යහන තලා සැප විඳලා පලදී නැතුවා පෙර පින්.

කොතරම් පිලිවෙලට සිරි යහන සකසා තිබුනත් එහි කායික ඇසුරක් සිදුවන විට මේ කොට්ට මෙට්ට තැලී පොඩිවෙනව. මෙලෙස කම් සැප විඳින්නට තමන්ට පෙර කල පින් නැති බව ඔහු සිතනව.

නෙතට නුහුරු කඳුළු බින්දු පැදුරට මුහු වෙලා ගොහින්.

කඳුළු බින්දු වැනි දෙයක් නිදන ඇදේ පැදුරට එකතු වෙලා තියනව. නමුත් මේවා නෙතෙන් ගැලූ කඳුළු බින්දු නොවෙයි. එයින් කියැවෙන්නෙ ජීවිතය හුදකලා වූ, ජීවිතය ඉතා අපිලිවෙල වූ, කම් සැප විඳින්න තරම් පින් නැතිවු, විවාහ විය හැකි නිසි වයසත් ඉක්මවු මේ තැනැත්තා , තම සිතේ ඇඳෙන කල්පිත කාන්තා රූප ගැන සිතමින් ස්වයං වින්දනයක් ලබනව. ජීවිතයේ ගැඹුරු සහ ඉතා සංවේදී පැතිකඩක් රසික හදවත් තුලට ගෙන යන මේ ගීතය ඉතා අපූරු නිර්මාණයක්

මෙම වෙබ් අඩවියෙන් කර උපුටා ගැනීමකි